2026-yil 27-oktyabrdan boshlab Oʻzbekiston aholisi Apple Pay va Google Pay orqali telefon bilan toʻlov qila oladi. Hamyonga mahalliy banklar chiqargan Visa va Mastercard kartalari qoʻshiladi.
Ishga tushish bosqichida Apple Pay sakkizta bank va fintex xizmatining kartalarini qoʻllab-quvvatlaydi, Google Pay esa toʻqqizta bankning kartalari bilan ishlaydi. Ayrim banklar hozircha faqat bitta toʻlov tizimini ulagan: Visa yoki Mastercard.
Google Pay ishga tushirilishi 19-oktyabr kuni Samarqandda eʼlon qilindi. Google Cloud vakili Marcin Krasuski bu haqda Markaziy Osiyo davlatlari va AQSHning C5+1 formatidagi uchrashuvlari doirasida raqamli texnologiyalarga bagʻishlangan panelda maʼlum qildi.
Milliy Humo va Uzcard tizimlarining kartalari hozircha bu xizmatlarga ulanmagan. Markaziy bank bu borada ish olib borilayotganini maʼlum qildi, biroq muddatini aytmadi. Mahalliy kartalar bilan telefon orqali toʻlash uchun HUMO Pay va UZCARD PAY allaqachon ishlab turibdi.
Raqamli toʻlovlar va banklarning texnologik kompaniyalar bilan hamkorligi SGBF mavzulari qatoriga kiradi.
